|
|
مافێ ژنێ ل دووڤ راستڤهكرنا پهرلهمانێ كوردستانێ
2010-03-01
دهۆك، باوهر مهجید:
|
|
|
دانانا مالا شهرعی بۆ خێزانێ ئێك ژ مافێن ژنێ یه و زهلام پێ پابهنده.
فهره ل سهر دادوهران ڤێ راستڤهكرنێ ل بهر چاڤ وهربگرن و ل دووڤ بچن، چونكه ئهڤ راستڤهكرنه د بهرژهوهندیا ژنێ دایه.
لهورا ل دووڤ قانوونا بارێ كهسایهتی ئهگهر ژنێ پشكداری د مالی دا كر دبیته قهر ل سهر زهلامی.
د. مستهفا محهمهد ئهمین ئهترووشی، مامۆستایێ تایبهتمهند د قانوونا بارێ كهسایهتی دا، دهربارهرهی ڤێ راستڤهكرنا د بابهتێ میراتێ ژنێ دا هاتیه كرن دبێژیت: (ل دووڤ قانوونا بارێ كهسایهتیا عیراقی بههرا ژنێ دێ 4/1 بیت ههكه (فرع وارس) نهبن و 8/1 ههكه ههبن.
ئهو راستڤهكرنا هاتیهكرن ل ههرێما كوردستانێ زێدهكرنه ل سهر قانوونا عیراقێ ب رستا (پشتی ئینانه دهرا وێ بهشداریا ژنێ كری د میراتی دا) مهرهم پێ 4/1 یان 8/1 دێ هێته دان بۆ ژنێ، پشتی دهركرنا وێ بهشداریا ژنێ د میراتی دا كری.
یاسادانهرێ كوردستانێ ئهڤ راستڤهكرنه كریه، چونكو د جڤاكێ مه دا گهلهك جاران ژن بهشداریهكا مهزن دههبوونا میراتی دا دكهت و ل دووماهیێ ژ ڤی میراتی بێ بههر دبیت، ژ وان پشكداریان ژی وهكو مههرا وێ یان ژی ئهگهر پشكهك ژ میراتێ دایك و بابێن وێ گههشتبیتێ، لێ جهێ داخێ یه د جڤاكێ مه دا ئهڤ چهنده ب بهرچاڤ ناهێته وهرگرتن.
بۆ نموونه ل دهمێ زهلام خانیهكی دكریت یان دێ ل سهر ناڤێ خۆ تومار كهت یان ژی ل سهر ناڤێ برایێ مهزن، بێ هزر بكهت كو ژنێ یان دهیكێ د ههبوونا ڤی مالی دا بهشداریا كری، ئهڤجا ب رێیا زێرێن وێ بیت یان كار بكهت و ب موچێ وێ بیت یان ب ههر شێوهیهكێ دیتر بیت.
ل دهمێ زهلام دمریت دێ بینین كو ژن چ ژ ڤێ چهندێ ناوهرگریت، ژبلی بههرا شهرعی 4/1 یان 8/1 ئهڤه ژی نه دادپهروهریهكه بهرامبهری ژنێ، چونكو ل دووڤ شهریعهتا ئیسلامێ بهشداریا ژنێ د مالێ زهلامی دا قهره ل سهر گهردهنا زهلامی و دڤێت ئهڤ بهشداریكرنه بهێته دهركرن بهری دابهشكرنا میراتی.
و ناڤبری گۆت: یاسادانهرێ كوردستانێ ئهڤ راستڤهكرنه كر دا كو بۆ دادوهران ئاشكرا بكهت، ل بهری دابهشكرنا میراتی ئهو بههرا ژنێ بهشداری كری دهربێخن.
مامۆستایێ پشتگر بو ڤێ راستڤهكرنێ ئهو ژی نه ڤهشارت، ئهگهر ئهڤ راستڤهكرنه نههاتباكرن دا گهلهك زۆری ل ژنێ هێته كرن و دا بێ بههر بیت ژ مافێ خۆ.
دهربارهی وێ چهندێ، تا چ راده دێ كارێ ژنێ هێته هژمارتن بهشداری د میراتی دا گۆت: خۆ ئهگهر ژنهك ل گوندی هاریكاریا زهلامێ خۆ بكهت و ژ ئهگهرێ ڤێ هاریكاریێ میراتهك پهیداببیت دێ بیته بهشداری بۆ ژنێ.
ههر ل سهر ڤی بابهتی د. ئسماعیل ئهبابهكر بامهرنی هـ. راگرێ كولیژا یاسا ورامیاری گۆت: دانانا مالا شهرعی ئێكه ژ مافێن ژنێ و پابهندیهكه ل سهر زهلامی و ژن نهیا پابهنده كو پشكداریێ د ڤێ چهندێ دا بكهت.
مامۆستایێ شارهزا د بوارێ بارێ كهسایهتی دا دیار كر ئهگهر ژنێ بهشداری كر و پاشان ژ ڤێ چهندێ لێڤه بوو، ئهو د شێت زڤڕاندنا پشكداریا خۆ بكهت، لێ ب مهرجهكی ئهو پشكداریا وێ كری ب شێوهیێ بهخشین نهبیت، چونكو ئهگهر بهخشین بوو، پاشی گوهۆرین تێدا هاته كرن، مافێ زڤڕاندنێ نامینیت و زڤڕاندنا بهخشینێ ژلایێ نهریتی و شهرعی و قانوونی نه كارهكێ جوانه، لێ ههكه بهخشین نهبیت و زهلام و ژن ل سهر ڤێ چهندێ رێكهفتن ژن دشێت بهشداریا خۆ ب زڤرینیت، لێ ئهگهر ناكوكی پهیدا بوو دێ بیته دادبینی و دادوهر دێ ڤێ چهندێ یهك لاكهت. د. عابد جهمیل مامۆستایێ كولیژا یاسا و رامیاری ل دهۆكێ ل دۆر بابهتی دبێژیت: ئهڤ راستڤهكرنا هاتیهكرن پێدڤی بوو ب شێوهیهكێ دیتر بایه، چونكو دبیت ژن ب دروستی دڤێ راستڤهكرنێ نهگههیت، ژبهر وێ چهندێ پێشنیار دكهین كو ل جهێ (پشتی ئینانهدهرا وێ بهشداریا ژنێ كری د میراتی دا) ئهڤا ل خارێ هاتبوو بكار ئینان (پشتی دهركرنا ماف و قهرێن ژنێ ژ مالێ زهلامی) و ئهڤ چهنده باشتره دا كو ژن داخواز نهكهت ب هندهك تشتان كو ناهێنه هژمارتن قهر و ئهڤ چهنده نهبیته ئهگهرێ پهیدابونا ئاریشان دناڤبهرا ژن و زهلامی دا.
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|