|
|
سهركهفتنا پارتی بهرههمهكێ ئاسایی یێ خهبات و مێژوو یا پارتیه
سهركهفتنا پارتی بهرههمهكێ ئاسایی یێ خهبات و مێژوو یا پارتیه
ئهڤرۆ، ڤهگێر سهعدوللا
|
|
|
ب دیتنا چاڤدێرێن سیاسی ب سهركهفتنا مهزنا پارتی دیموكراتی كوردستان د ههلبژارتنێن جڤاتا نوونهرێن عیراقێ دا بارێ پارتی گران تر لێ هات و دیسان ئهڤ سهركهفتنه ژ ئهنجامێ ههلبژارتنا بهربژێرێن باش ژلایێ پارتی ڤه هات و ب ڤێ سهركهڤتنێ ههر كوردهك دێ پتر ههست ب ئهمانهتێ كهت ژ بهركو بریارا سیاسیا كوردستانێ دێ كهڤیته دهستێن پارتی و بارزانی دا.
دلشاد شههاب پهرلهمانتارێ كوردستانێ بۆ رۆژنامهیا ئهڤرۆ دیار كر وهكو دهرهئهنجامێن ههلبژارتنان دهرئێخستین و مه ژی باوهری ههبوو ب مێژوویا پارتی، ب شێوازێ سهرهدهریا پارتی دگهل ریدانێن سیاسی، ب شێوازێ رێڤهبرنا پارتی بۆ حكۆمهتێ، ههر چهنده بیرئانینهكا نهخوشه بهحسێ دو ئیدارهیێ بكهین لێ د جهێ خۆ دا یه كو پارتی شانازیێ ب ئیدارا خۆ بكهت، ب جهماوهرێ خۆ بكهت، ب مێژوویا خۆ بكهت و شانازیێ ب حزب و كادرو ههموو كار بهدهستێن خۆ بكهت.
دلشاد شههاب ههروهسا گۆت:سهر باری هندێ ئهڤ ئاخفتنێن ئهم د بێژین مهعنا وێ ئهو نینه كو مه چ كێماسی نینن، بهلێ دگهل وان ههموو بارودوخێن كو ئهم تێدا دهرباز بووین و ئهو واقعێ ل كوردستانێ ههیی كو گهلهگ جاران رێگر بویه ل بهرامبهر جێ بهجێكرنا پروگرامێن پارتی یان گهلهگ جاران ژی ئاستهنگ بۆ پارتی چێبووینه ژلایهنێن دهرهكی ڤه ژی، گهلهگ بهلگهنامێن مێژووی ل سهر وێ چهندێ ههنه كو ههر دهمێ دوژمنێن كوردان ڤیا بیت ئاستهنگهكێ بۆ دوزا كوردی چێ بكهن پارتی ب دوژمنێ ژماره ئێك زانی یه و ههموو ههولێن خۆ یێن دایین كو رێگریا بۆ پارتی چێ بكهن.
لێ سهرباری وان ههموو بارودوخان ئهڤرۆ دهركهفت كو پارتی یا دناڤ جهماوهری و دلێ خهلكی دا.
ژ لایهكێ دی ڤه سیاسهتمهدار عهبدولسهلام بهرواری بۆ رۆژنامهیا ئهڤرۆ دیار كر ئهڤ سهركهفتنا هوسا دزڤریته ڤه وێ یهكێ كو پارتی یا سهركهفتی بۆ د ههلبژارتنا بهربژێرێن خۆ دا و بهربژێرێن ب هێز دهست نیشانكرن كو جهێ باوهریا خهلكی بوون، ههروهسا ئهڤه وێ یهكێ دیار دكهت كو پارتی وهكو هێزهكا خۆدان ئهزموونهكا دوور و درێژ شێوازێ هاندانا كادر و لایهنگرێن خۆ و رێنمایێن وان بۆ دهنگدانێ شیا مفای وهرگریت ب دو تشتێن گهلهگ گرنگ كو سیمایێن پارتی نه ئێك باوهریا جهماوهرێ پارتی، دو وهفا و ئیلتیزاما جهماوهرێ پارتی ژبهر هندێ دهنگێن وان زور بهلاڤ نه بوون و هندهك لایهنێن دی رهنگه ژمارهكا باشا دهنگان ئینا بن لێ شێوازێ وان بۆ رێڤهبرنا ههلبژارتنا دروست نه بو لهومان كورسی بدهستفه نه ئینان.
ب گورهی ئاخفتنێن دلشاد شههاب رهنگه دهربارهی كادرێن پارتی یا غهریب نهبیت ئهڤ سهركهفتنه بهلكو ژ تموحاتێن مه هێشتا كێمتر ژی بیت و گۆت:ئهز دبینم ئهڤ سهركهفتنه بهرههمهكێ ئاسایی یێ خهبات و مێژوو و ئهڤرۆ و دیتنا پارتیه بۆ پاشهرۆژێ ژی.
ب دیتنا عهبدولسهلام بهرواری جهماوهرێ كوردستانێ چ ئهندام و لایهنگرێن پارتا بن یان جهماوهرێ بێلایهن بن ههست بهندێ دكهن كو دڤێ قوناغێ دا بابهتێن چارهنڤیساز هێشتا نه هاتینه چارهسهر كرن دگهل بهغدا و باوهریا خهلكێ مه ب پارتی و رێبازا بارزانی یه كو چارهسهریێ بۆ ڤان كێشان ببینیت ئهڤه جهێ دلخوشیێ یه كو خهلكێ مه باش تێدگههیت و سهرهرای كێم و كاسیان دهمێ دگههیته مهسهلێن چارهنڤیساز وهلاتیێن مه دهنگی دهنه وی لایهنی یێ كو پتر باوهری پێ ههی و شیانێن چارهسهریێ ههی بۆ كێشێن چارهنڤیساز.
د لایهكێ دی یێ ئاخفتنێن خۆ دا دلشاد شههاب گۆت:ب دیتنا من پارتی ئهڤرۆ ژ ههر وهختهكێ دی پتر دكهڤیته بن بهرپسیارهتیهكا مێژوویی یا مهزن ژ بهركو ئێدی بریارا سیاسیا كوردستانێ دێ ل سهر پارتی حسێب بیت و پارتی دێ كهڤیته بن بارێن گهلهگ قورس ئێك ژوان دهربارهی مللهتێ خۆ كو د بارودوخهكێ هوسا یێ نازكدا باوهریا خۆ دا یه پارتی و یا دوێ ژی پارتی دێ كهڤیته بهرامبهر بهرپرسیارهتیهكا مهزن ب بریار دان د كێشا نهتهوهیی و نیشتمانیا كورد و كوردستانێ دا و چاوانیا ب رێڤهبرنا قوناغا بهێت كو قوناغهكا گهلهگا نازك و ب زهحمهته.
لدور وێ یهكێ كا پشتی ڤێ قوناغێ چ ل پارتی دهێته چاڤهرێكرن و خاستن دلشاد شههاب گۆت:دڤێت پارتی ب سهركردایهتیا خۆ ڤه ب كادر و كوتلهیێن خۆ ییێن پهرلهمانی ڤه ل بهغدا و ههولێرێ و قاعدێ جهماوهریێ خۆ ڤه حسابێ بۆ ههر پێنگاڤهكا خۆ بكهت چونكو نها وێ ڤه ئهركێ پارتیێ قورسه.
د دوماهیا ئاخفتنێن خۆ دا عهبدولسهلام بهرواری گۆت:ل رۆژا سهركهفتنێ پێدڤیه مه گۆتنا بارزانی ل بیر بیت كو ل سهركهفتنا غرور مه نه گریت و پێدڤیه ئهڤه ببیته هاندهرهك بۆ سهركردایهتیا پارتی و لق و ناوهندێن پارتی.
ئهز د بێژم ل هندهك جهان و هندهك بهربژێران دوپات كر كو ئهگهر تو ب شێیی ب رێكهكا باش كهنالهك ههبیت بۆچوونێن خهلكی بزانی ههتا كاندیدهكێ بدانی حهزا خهلكی ل سهر بیت نه كو ل دووڤ حهزا ته بیت و ل سهر خهلكی ب سهپینی.
ب دیتنا من پێدڤیه سهركردایهتیا پارتی رێزێ ل ئیلتیزاما كادر و جهماوهرێ خۆ بگریت و یا دوێ ژی وانا هندێ وهربگریت كو ههلبژارتنێن بهێت وان كاندیدان بهربژێر بكهت ئهڤێن كو دلنیا بیت جهێ رهزامهندیا خهلكی نه ژ بهركو ههر ئهو خهلكه یێ دهنگی ددهت.
ژلایێ خۆ ڤه دلشاد شههاب دیار كر جهنابێ بارزانیێ نهمر ئهم یێن فێر كرین كو نا بیت د سهركهفتنا دا غرور بین و دشكهستنا دا ژی بێ ئومێد بین و ئهڤه ئێكهم سهركهفتن نینه و ب نسبهت پارتی و گۆت:ژ بهرهندێ داخوازا من ژ ههموو خوشتڤیێن پارتی، جهماوهرێ پارتی، كادرێن پارتی، وهكو كادرهكێ بچوكێ پارتی داخوازا من ژ سهركردایهتیا پارتی ژی كو ئهم ڤێ دهلیڤێ ب باشتریین شێوه تهرخانبكهین بۆ خزمهتا گهل و مللهتێ خۆ و ئهز باوهر دكهم ئێدی ههر كوردهك ل دونیایێ دێ پتر ههست ب ئهمانێ كهت دهمێ بریار دكهڤیته د دهستێن پارتی و سهرۆك بارزانی دا و مێژویێ ژی ئهڤ چهنده یا سهلماندی.
|
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|